…Այս ծրագիրը ընթացքի մեջ է…
Նկարագրություն և նպատակ
«Վահե և Լուսի» հիմնադրամը սկսում է ստեղծարար ոլորտներում կարողությունների զարգացման համապարփակ ծրագիր` նախատեսված հատուկ Արցախից բռնի տեղահանված երիտասարդների համար: Փոփոխություններ բերող այս նախաձեռնությունը կմեկնարկի փետրվարին և կտևի 16 ամիս:
Ռազմավարական զարգացման համաձայն` առաջին ամիսներից հետո` ապրիլին, մասնակիցներն անխոչընդոտ կերպով կընդգրկվեն «Վահե և Լուսի» հիմնադրամի ինկուբացիոն ծրագրում: Համագործակցության այս փուլի ընթացքում նրանք կինտեգրվեն 15 այլ մասնակիցների հետ՝ հետագայում ընդլայնելով կապերը և համատեղ ուսուցման հնարավորությունները:
«Վահե և Լուսի» հիմնադրամի ինկուբացիոն ծրագիրը նրանց համար կդառնա կարողությունների զարգացման ճանապարհի շարունակություն՝ առաջարկելով վերապատրաստման լրացուցիչ դասընթացներ, սեմինարներ և հնարավորություններ` վերջիններիս հմտություններն ու գիտելիքները բարելավելու նպատակով:
Նպատակ և առավելություններ
Այս ծրագրի հատուկ տարբերակը ստեղծված է մասնակիցներին եզակի և անհատականացված փորձ առաջարկելու համար։ Ծրագրի առաջնային նպատակն է հինգ անհատների կամ թիմերի ուղղորդել և աջակցել ծրագրի ողջ ընթացքում իրենց ստեղծագործական ձեռնարկատիրական գաղափարների մշակման, փորձարկման և իրականացման գործում:
Գլխավոր նպատակի համաձայն` բոլոր մասնակիցները ավարտելիս կունենան զարգացած հմտություններ, գիտելիք և կապեր՝ դրանով իսկ նպաստելով Հայաստանում ստեղծարարության և ստեղծագործական արդյունաբերության ոլորտի աճին և ամրապնդմանը:
Ծրագրում ընդգրկված յուրաքանչյուր անհատ կամ թիմ կունենա հետևյալ առավելությունները.
- Անհատական մասնագիտական աջակցություն
- Սեմինարներ գաղափարների փորձարկման, բիզնես մոդելավորման, մարքեթինգի, ֆոնդհայթայթման, ֆինանսական կառավարման, փիչինգի և այլնի վերաբերյալ:
- Մենթորություն/քոուչինգ
- Իմփաքթ Հաբ Երևանի անդամակցություն
- Ոգեշնչող միջավայրում աշխատելու հնարավորություն
- Միմյանցից և միմյանց հետ սովորելու հնարավորություն, ինչպես նաև տարբեր ցանցային միջոցառումներ
- Ավելի քան 350 ստեղծագործ նորարարների մասնագիտական ցանցի հասանելիություն
- Ավելի քան 110 Իմփաքթ Հաբերի հասանելիություն ամբողջ աշխարհում
- 1500 ԱՄՆ դոլարի ֆինանսական պարգև
Այս դրամական աջակցությունը նախատեսվում է օգտագործել գործիքների, սարքավորումների, ծրագրային ապահովման կամ ցանկացած այլ անհրաժեշտության ձեռքբերման համար, ինչը կարևոր է ստեղծագործ նախագծերի զարգացման և հաջողության համար:
Այս միջոցները կբաշխվեն` ըստ ծրագրի ընթացքում բացահայտված հատուկ կարիքների, ապահովելով, որ յուրաքանչյուր մասնակից ստանա համապատասխան աջակցություն՝ առավելագույնի հասցնելու իր ձեռնարկատիրական ջանքերի ազդեցությունը:
Ծրագիրն ավարտած մասնակիցները հնարավորություն կունենան միանալու Իմփաքթ Հաբ Երևանի շրջանավարտների հատուկ անդամակցությանը, ինչը նրանց հնարավորություն կտա պահպանել երկարաժամկետ հարաբերություններ և օգտվել այն արտոնություններից, որոնք, իր ծրագրերի շրջանակներից դուրս, առաջարկում է Իմփաքթ Հաբ Երևանը:
Կարևոր ժամկետներ
- Ծրագրի տևողությունը 1,5 տարի է
- Դիմելու վերջնաժամկետը` Փետրվարի 18, 2024թ., ժամը` 23:59 (Երևանի ժամանակով)
Ովքե՞ր կարող են դիմել
Այս ծրագրի թիրախային խմբերն են` անհատները, հետազոտողները, հասարակական կազմակերպությունները, բիզնեսները, սոցիալական ձեռնարկատերերը կամ նախագծերը, որոնք անցել են գաղափարի փուլը և ուղղված են դեպի Հայաստանի ստեղծագործական արդյունաբերություններ: Վերջիններս ներառում, բայց չեն սահմանափակվում
հետևյալով.
- Երաժշտություն, կատարողական արվեստ, վիզուալ արվեստ
- Արհեստներ (օրինակ՝ ջուլհակություն, կահույքի դիզայն և ոսկերչական իրերի դիզայն)
- Կինո, հեռուստատեսություն, անիմացիա, վիզուալ էֆեկտներ, վիդեո, ռադիո և լուսանկարչություն
- Տեսախաղեր, վիրտուալ իրականություն և ընդլայնված իրականություն (VR & XR)
- Թանգարաններ, պատկերասրահներ և մշակութային ժառանգությանն առնչվող ձեռնարկություններ
- Գրական ստեղծագործություններ, հրատարակչություն և գրադարաններ
- Դիզայն, ներառյալ արտադրանքի դիզայնը, գրաֆիկական դիզայն և նորաձևություն
- Ճարտարապետություն և քաղաքային դիզայն
- Գովազդ և մարքեթինգ
- Խոհարարական արվեստ
Ծրագրում ընդգրկվող մասնակիցները պետք է պարտավորվեն ցուցաբերել պատշաճ մասնակցություն, ինչը ենթադրում է բարձր կատարողականություն, բարեխիղճ ներկայություն և ակտիվ մասնակցություն բոլոր հնարավոր միջոցառումներին և դասընթացներին: